尋日喺土瓜灣發現有唐狗遭綁水龍頭綑膠袋浮屍大海，懷疑有人殘酷虐殺動物，社會上又再猛烈抨擊政府漠視動物福利。話時話，漁農自然護理署喺舊年4月就修訂《防止殘酷對待動物條例》進行公眾諮詢，建議提升殘酷對待動物嘅罰則至最高判監10年同罰款200萬元。雖然加強阻嚇力，但修例嘅步伐好漫長，預料最快明年先至向立法會提交草案，仲唔知要審議幾耐，隨時又拖幾年。既然要堵塞漏洞，嚴懲班虐待動物嘅狂徒，漁護署署長梁肇輝唔好再拖字訣，快手快腳修例喇！
