政情：警隊飛起港台 新節目《警聲直播》網上登場
香港電台喺反修例風波期間，播放嘅節目經常嘲諷警隊，實在令人忍無可忍，警隊終於喺今年8月正式飛起港台，結束同對方合作拍攝47年嘅電視節目《警訊》。正當大家以為警隊會搵新嘅合作夥伴，原來警隊將自家製作新節目《警聲直播》，由今日起每逢星期四晚上9點，喺警隊Facebook專頁及YouTube頻道以直播方式進行，節目播放時間暫定約15分鐘。
《警訊》舊主持擔綱
據悉，《警聲直播》由兩位《警訊》末代主持人黃家倫及莫藹祺負責，佢哋話過往嘅製作模式，由商討劇本、擬定拍攝日期到剪接，節目播出可能已是數星期後，唔少資訊已告過時。另外，市民花喺社交媒體嘅時間較以往長，傳遞資訊亦必須要更快同更互動，認為隨着科技進步及資訊發達，傳遞滅罪、防罪等訊息，其方式必須與時並進，爭分奪秒。
黃家倫又指近來暴力示威大減，但事實上一啲遭不實資訊誤導嘅人，仇警心態依舊，希望《警聲直播》能為警隊抗衡不實資訊。莫藹祺謂，唔少違法人士被帶返警署後以為會被打、被強姦，後來都知道全屬無中生有，希望新節目可以第一時間畀市民弄清真相。