政情：政府上年度逾5億欠款撇帳 柯創盛扯火

財庫局追討無力 態度消極

財庫局表示，過去5個財政年度，各政府部門因未能收回欠交款項而引致政府撇帳嘅總額合計達24.39億元；而喺啱啱過去嘅3個財政年度，政府每年撇帳總額都超過5億元，其中喺18／19年度嘅總額更接近8億元。財庫局又話，政府並唔掌握資助機構嘅相關數字，僅重申政府會確保公帑獲審慎使用。

被問到政府會否因應當前財政狀況加大力度追討欠款時，財庫局喺書面回覆中未有正面回應，只係重申政府內部有制訂指引，各政府部門會繼續通過唔同方法向欠交款項者追討欠款咁話。

柯仔就話，自己對呢啲數字感到驚訝同憤怒，形容若非議員追問資料，當局唔會公開有關數字。佢狠批當局過去追討力度不足、態度消極，認為相關主事官員必須問責。佢又批評，當局未有同時交代資助機構嘅撇帳情況，擔心真實數字會更大，又提醒政府內部亦應開源節流。