政情：「行政主導」立會拗出火 何君堯鬧葉建源蠢人

議員何君堯喺會議上發言，指香港冇三權分立，司法權唔可以被無限放大，又話《基本法》列明香港屬行政主導，批評泛民議員希望海外法官嚟到香港後監察特首做嘢，係離經叛道、妖言惑眾。

梁美芬拒裁決 泛民發難糾纏

議員葉建源就話搵唔到《基本法》有寫「行政主導」，何即刻大嗌「48（條）呀蠢人！」葉建源聞言隨即指摘何君堯言語冒犯。委員會主席梁美芬就認為，屬兩人相互判斷嘅問題而拒絕作裁決。其後，何君堯更正話《基本法》第43條指行政長官係香港首長，所以代表香港係行政主導，而非早前講嘅第48條。

梁美芬拒絕裁決，惹來在場泛民議員嘅質疑，其中涂謹申問梁「唔知可唔可以話你（梁美芬）係蠢人呢？」梁回應話身為資深議員，唔應該咁樣動氣。涂指出，以蠢人嚟形容在席嘅議員竟不屬冒犯，對梁嘅判斷存疑，但唔會嘲諷梁係蠢人。梁就話「你咁樣咪聰明啲囉」，點知涂突然反擊，指「雖然事實上梁美芬係蠢人」。何君堯就衝出嚟保護梁，話涂嘅言論冒犯主席，不過梁就話自己有胸襟，唔想再作糾纏喇！

葉劉斥三權分立為「英國茅招」

當何君堯斥葉建源係「蠢人」，法律界議員郭榮鏗亦睇唔過眼，幫拖話「要聽傻佬（何君堯）教我哋咩叫憲法，係議會恥辱」，又話期望海外法官可繼續秉持香港三權分立等重要憲政原則。議員葉劉淑儀就直斥三權分立係錯誤理解，香港從來冇三權分立，批評係「英國人臨走前想做嘅茅招」，係末代港督彭定康當時不停洗腦，奢望可以改變香港制度，但之後失敗告終，同時寸郭榮鏗去過英國留學都唔識嘢。

其實會議嘅正題係討論任命英國最高法院副院長賀知義，出任終審法院非常任法官嘅事，身兼執業律師嘅議員周浩鼎，質疑海外法官或未能充分了解一國兩制原則同《基本法》，但就要審判關乎香港憲制秩序嘅重要案件，憂慮會造成深遠嘅影響。原本係執業大律師嘅梁美芬亦認為有關方面應小心編排審案，避免要海外法官處理具爭議性嘅案件，同時海外法官應該同香港有關方面多作交流，令一國兩制得以成功運行。

對於行政長官接納司法人員推薦委員會推薦賀知義，議員許智峯同何君堯分別投反對同棄權票，有關嘅任命決定將交上立法會大會審議。