中環出更：議員打流感針 馬逢國半露「香肩」

唔少議員因為着西裝、恤衫，所以打針之時都要捲起衣袖，又或者到屏風後面除咗件衫去打針。之不過，馬逢國就未有咁做，反而喺一班記者面前坐定定解開恤衫鈕扣，露出左邊「香肩」畀護士打針，更用右手撳住件衫以防走光，同喺隔籬為咗方便打針而着短袖衫嘅議員田北辰形成強烈對比，隨即吸引眾人目光。

陳克勤驚針拮 好肉緊

睇番尋日成個打針過程，基本上每位議員都好淡定，唯獨議員陳克勤（克勤）就好緊張，仲叫在場監督嘅食物及衞生局局長陳肇始講個笑話嚟聽吓。至於克勤做咩咁肉緊呢？佢就話「要畀針拮，驚o架嘛」，之不過未等到人家開口講笑話，接種疫苗已告完成。

陳克勤（中）話驚畀針拮，然而話音剛落疫苗接種即告完成。

何俊賢（右）指廖長江（左）雖外表嚴肅，但其實好玩得。

另外，一班議員打針前都要先量體溫，入場位置亦設置咗一個座地式嘅體溫探熱器。唔少人為咗方便都以手掌代替額頭去量度體溫，對於身高逾1米9嘅議員何俊賢（高佬賢）嚟講，要用額頭量體溫就須俯首哈腰，難免有一定難度。

當高佬賢見到建制派「班長」廖長江行到探熱器旁邊，就講笑話班長高度同探熱器相若，叫佢用額頭量體溫，仲直接拎起個探熱器朝向班長。之不過，高佬賢咁樣講笑怕唔怕班長嬲o架？佢就話唔好睇班長平時好嚴肅，但佢份人其實好玩得o架。

今年冬季正值新冠病毒同季節性流感雙重夾擊，尋日就有37位議員參與接種季節性流感疫苗活動，人數係自2015年首次舉辦呢項活動以來最高。

卓妮