雖然近日確診嘅個案回落到單位數字，但仍有源頭不明嘅個案，反映仲有隱形患者喺社區游走，咁嘅情況先恐怖，隨時又會有大規模感染。食物及衞生局局長陳肇始早前都有提及病毒嘅傳染率好高，所以要考慮強制檢測，仲話要研究下啲法律條文，但講吓講吓就冇咗下文。唔係呀？講到咁兇險，陳肇始又歎慢板，咁就即係攞市民健康嚟較飛，尤其萬一疫情又大爆發再加上冬季流感夾擊，到時就不堪設想嘞！
