中環出更：擊敗癌症服務社群 傑青吳家榮播正能量
常言道以生命影響生命，相信參與社區服務係其中一個途徑，唔單止受助人可以獲得直接嘅幫助，付出嘅一方亦往往有意想不到嘅得着。傑青吳家榮（Gary）十四歲時不幸患上骨癌，需要切除左腳，但佢話當年有過來人同佢分享抗癌經歷，令佢積極接受療程，亦決意喺日後鼓勵更多癌症病人。
卓妮早前出席傑出學生服務獎頒獎典禮，Gary分享當年做義工嘅契機，話康復後更積極參與社區服務，包括去學校同病人組織做分享，佢亦係一位醫生，仲曾經返到當年接受治療嘅屯門醫院骨科服務添！Gary話凡事都有兩面，話若然身處第三世界，可能未完成診斷就已經離開人世。雖然工作繁忙，但Gary放假都會帶三位小朋友去做義工，希望繼續散播正能量嘅種子。
落力參與社區服務嘅仲有傑青黃仰芳（Fonia），佢當年做義工嘅契機就相對簡單，由於家境貧窮，冇辦法參加課外活動，覺得完成功課後就無所事事，於是決定去樓下嘅社區中心服務小朋友。做義工當然係一件好事，但Fonia話媽媽覺得應該將時間投放喺學業之上，佢惟有瞞住媽媽去做義工，直至大學時期獲得相關獎項，媽媽先知佢成日夜歸原來係去做義工。
黎子傑：年輕人可出國做義工
今次頒獎典禮由香港傑出專上學生服務協會舉辦，會長陳俊安、創會會長黎子傑（Danny）同創會副會長盧華基（Roy）當然在場喇！講起隨着時代變遷，年輕人參與社區服務都有所不同時，Roy話當年仲未有智能電話，籌備活動需要謹慎安排流程同人手，以確保萬無一失，不過總會遇到啲意外，例如由於塞車冇辦法準時到達場地，都好難預早通知其他夥伴。Danny認為現時嘅年輕人相對投放較少時間於社區服務，但認為佢哋更加國際化，可以走出國外做義工，而佢哋當年由於機票價錢昂貴，多數只可以喺內地做義工。
卓妮