中環出更：籲僱主善待外傭 李育珍：否則自己蝕底
香港好多雙職家庭，需要聘請外傭打理家頭細務。之不過香港人出名要求多多，開設僱傭公司嘅半島旭日扶輪社社長李育珍（Candy）話自己同時都係「用家」，話希望僱主明白外傭都只係得一雙手，工作能力有限，亦應該善待外傭。
卓妮早前去咗半島旭日扶輪社嘅交職典禮，Candy話最初係朋友講起覺得佢份人諸事八卦，鍾意咩都管一餐，就建議佢從事僱傭公司嘅工作，Candy都鄭重其事，先後喺三十幾間僱傭公司打工，先決定自己成立公司。Candy話知道有部分僱主只係留鵝頭、鴨頸畀外傭食，仲要求外傭瞓木板，Candy就會化身為調解員，希望僱主明白外傭只係想簡簡單單打份工，要善待外傭，否則最後蝕底嘅都係自己，始終都係要日見夜見，而且係將成頭家交畀外傭打點。
謝鳳珍：視為家中一分子
半島旭日扶輪社前社長謝鳳珍（Joann）係Candy嘅「客仔」，請咗外傭廿幾年，佢話要謹記外傭千里迢迢，孤身一人嚟香港，僱主唔應該對佢哋要求太苛刻，同時要視佢哋為家中一分子。Joann亦講到自己以往每個月都會去旅行，但疫情下無得周圍飛，加上少咗出席活動，多咗時間留喺屋企，同外傭感情都好咗，不過Joann就話外傭比較文靜，佢就需要做主動嘅一方打開話題喇！
金鐘扶輪社前社長周基業（Keith）屋企請咗三個外傭，佢話因為人多，要幫佢哋分配好工作，以免外傭之間喺工作上出現拗撬。Keith有兩個小朋友，其中一個只係得幾個月大，所以非常注重家中清潔，佢覺得難以完全避免外傭出門放假，不過都會多加提醒佢哋注意衞生，而外傭都好自覺，入屋之後會即刻沖洗，仲會將各人嘅衣物分開放入洗衣機，Keith仲搞笑咁話所以屋企有好多個洗衣籃添！
卓妮