政府前日宣布放寬部分社交距離措施，例如容許旅行社舉辦每團唔多過三十人嘅本地遊，喺室內舉辦嘅婚禮、股東會等，人數上限更加增至五十人。之不過，當局未有同時放寬喺公眾場所實施嘅四人禁聚令，被質疑係多重標準，甚至有人考慮循司法途徑提出挑戰添。查實自疫情爆發至今，政府多輪防疫政策都為市民所詬病，社會上更傳出要求撤換主責嘅食物及衞生局局長陳肇始。若陳唔能夠釋除市民嘅疑慮，佢頂烏紗恐怕會不保呀！
