政情：香港故事過期 丁新豹：係時候改變
開幕近廿年嘅香港歷史博物館「香港故事」常設展廳，喺日前開始關閉，以進行大規模翻新工程，前館長丁新豹尋日出席活動後就提到，「香港故事」開展近廿載，期間幾乎無任何改變，依家係時候要變，加入更多科技元素。
將加入更多創新技術
丁曾任歷史博物館館長，任內籌建「香港故事」展覽，如今被拆卸，一手設置嘅展廳冇咗，佢會唔會有感觸或不捨呢？丁就指常設展廳並非永久，其實過得十年八載就要變一變，改一改，但「香港故事」一擺就擺咗廿年，可以話過咗期好耐！理應盡早去改。
至於要改啲咩，丁就話，重要嘅係展廳嘅形式要變，又指今日好多事物如科技手法，係該展廳設立之初所不具，今次翻新應該全部重新做過，加入多啲創新技術咁話。