政情：建制再包攬兩委員會正副主席
立法會財務委員會轄下兩個小組委員會尋日朝早選舉正副主席，其中人事編制小組委員會由新民黨議員葉劉淑儀以廿三票當選主席，同樣獲提名嘅民主黨議員林卓廷、涂謹申及會計界議員梁繼昌全部得票係零。
葉劉任人事小組主席
至於人事編制小組委員會副主席一職，則由旅遊界議員姚思榮以廿三票當選，擊敗得十三票嘅教育界議員葉建源同十名民主派議員。民主派喺點票期間高呼「十二號，釋放十二港人」嘅口號，但主持會議嘅議員周浩鼎未有制止。
緊隨其後嘅工務小組委員會由工程界議員盧偉國主持，結果建築、測量及都市規劃及園境界議員謝偉銓取得廿四票成功當選主席，徹底拋離只得一票嘅鄺俊宇；而盧偉國則以廿三票當選副主席，擊敗得十四票嘅議員毛孟靜。