中環出更：泛民狂點人數 立會又流會
立法會拉布成風，民主派議員經常使用點人數同埋不停發言嘅招數。尋日係今個立法年度嘅第二次大會，但連質詢環節未完結又流會喇。今次負責點人數嘅，係人稱「一舊雲」嘅民主黨議員黃碧雲。
政府因應新冠肺炎而決定押後立法會選舉，民主派當時就延任與否引發爭議，最終班議員決定延任，仲話會提升肢體衝突抗爭添。上星期係今個立法年度嘅首個大會，民主派已經多次點人數，不過就流唔成會。
許智峯企上枱 行為不檢被逐
民主派今個星期重施故技，繼續多次點算法定人數。會議當時正處理第五項議口頭質詢，黃碧雲就要求點算法定人數，結果喺一點半左右就流會，當時連埋主席有三十四名議員在席，民主派只得公民黨郭榮鏗在席，建制派就有八人不在席，包括民建聯蔣麗芸、黃定光、工聯會陸頌雄、自由黨鍾國斌、邵家輝、新民黨葉劉淑儀、實政圓桌田北辰同埋獨立嘅謝偉俊。
會議約一小時後復會，議員變相有時間食埋個晏晝。喺之後嘅會議，民主派仍繼續點人數。復會後，主席梁君彥就話尊重議員有點人數嘅權力，但作為主席需要確保會議順利進行，希望議員點人數都唔好打斷官員發言，話口未完就有議員即刻要求點人數，梁君彥就話提規程問題要先得到主席批准，仲話如果行為不檢點會要求議員退席。民主黨許智峯就喺發言期間，辱罵梁君彥，之後又企上枱大叫。梁認為許嘅行為極不檢點，要求許離開會議廳。
尋日立法會一共點咗十次人數，歷時一小時五十五分鐘。
卓妮