中環出更：「親往墳墓屬尊重」 梁福元：網上拜祭冇得比
再過幾日，就係登山掃墓、 拜祭先人嘅重陽節。但礙於疫情肆虐，加上禁聚令嘅社交限制，今年嘅節日色彩難免大打折扣。儘管科技進步，近年有網上拜祭嘅出現，不過十八鄉鄉事委員會前主席梁福元就認為，網上拜祭同親身拜祭完全冇得比，後人要遵守傳統嘅習俗，先至算係尊重祖先。
梁福元指過往嘅傳統，村民拜祭完先人之後會一齊聚餐，隨時有成一、二百人食飯（口架）！梁強調習俗唔可以停，但今年為咗配合政府嘅防疫要求，重陽節只能每家每戶派代表去拜祭，仲要分開唔同日子前往。佢話禁聚令之下，就算有親戚喺內地過身都冇得去送佢哋最後一程。至於近年興起嘅網上拜祭，梁坦言未能接受，指先人在生之時為子孫辛苦建設、遮風擋雨，後人親身去到墳墓拜祭，例如清潔同埋打理一下雜草，都係一份孝心，代表咗對先人嘅尊重。
侯志強帶孫掃墓 傳承習俗
講起以前重陽節嘅習俗，上水區鄉事委員會主席侯志強指自己童年時代，會同幾間學校嘅學生一齊敲鑼打鼓咁去拜祭，有埋樂隊非常熱鬧，係一件盛事嚟。今年疫情關係就惟有由德高望重嘅村代表去拜祭，不過侯都表示接受唔到網上拜祭，認為始終祭品同後人都要親身去到墳前。佢又話會帶埋孫仔孫女去，因為傳統係要一代傳一代嘅，不忘初心嘛。
鄉議局執委廖書蘭係台灣人，佢父母嘅墓地亦都喺台北。今年因疫情關係，廖書蘭都無法喺清明同重陽節返去台灣拜祭父母。不過佢話之前返去台灣，自己都會聯同兄弟姊妹前往拜祭，佢覺得有心嘅話唔需要限於指定節日，任何時候都可以紀念先人。
卓妮