中環出更：阻立法禁辱公職人員 泛民唔做功課捱轟
喺上年六月爆發嘅反修例風波至今仍未平息，話說立法會公務員及資助機構員工事務委員會尋日舉行會議，喺詢問委員嚟緊呢年想討論乜嘢議程時，議員葛珮帆（EQ）就去信委員會主席郭偉強，希望討論立法禁止侮辱公職人員等，點知泛民議員就玩嘢，攻擊建制派政黨之餘，仲要求研究埋禁止公職人員侮辱市民喎。
EQ喺會上要求盡快討論包括立法禁止侮辱公職人員、公務員宣誓建議嘅研究進展、公務員嘅福利及退休年齡安排等六項議程。點知議員林卓廷質疑議員作為公職人員，倘若建制派政黨嘅議員在街道上被市民責罵，係咪會構成犯罪？另有泛民議員質疑公務員宣誓屬迫害，認為要研究埋禁止公職人員侮辱市民添！
委員會已傾咗一段時間
EQ唔知係咪唔忿氣，隨即反駁話泛民唔做功課，仲解釋話委員會討論立法禁止侮辱公職人員已有一段時間，政府亦都已經提出公務員宣誓，反問點解唔可以傾相關議程？同時佢都大鬧泛民唔知喺度做咩，質疑佢哋根本唔知事務委員會嘅過往研究同埋討論緊啲乜嘢囉！
話時話，議員其實都係公職人員，一旦立法其實對所有議員都有影響，泛民再唔做功課嘅話，到時分分鐘惹禍上身都唔知呀！
卓妮