中環出更：追趕潮流 蔡黃玲玲撲飛睇演唱會
音樂可以陶冶性情、令人身心放鬆，同時亦可透過不同時代嘅音樂去了解當代社會嘅狀況。仁愛堂前主席蔡黃玲玲向來醉心古典音樂，估唔到仲會聽吓流行音樂，更透露某台灣偶像歌手首次嚟香港開演唱會，儘管自己並非歌迷都照樣撲飛入場，理由係希望可以喺現場感受時下年輕人鍾意啲乜。
卓妮早前喺小提琴家姚珏發起嘅「弦動人生嘉獎禮」上遇到蔡太，佢話聽古典音樂既可培養品格，亦可以了解歷史文化。佢仲話，為咗更了解社會潮流趨勢及情況，雖然自己唔係實力派或偶像級歌手嘅擁躉，但都樂意親赴演唱會以示支持。不過礙於疫情，唔少音樂會都告吹，所以蔡太近來都多咗上網聽音樂，但佢強調要做好時間分配，唔可以沉迷使用電子產品，影響日常生活。
姚珏料未來授課需配合網絡
疫情不但影響到音樂表演，就連音樂教學亦迎來新挑戰，姚珏提到近日唔少小朋友都要透過網絡學琴，又指隨着科技日臻完善，上網嘅畫面清晰度同聲音質素大大提升，相信網上學習同親身授課互相配合嘅教學模式，喺未來會成為主流，但就難以完全取代親身面授。講起電子科技，依家唔少後生仔練琴時都以平板電腦取代傳統樂譜。不過姚老師就話自己都係鍾情於紙張嘅質感，鍾意自己親自喺樂譜上寫寫畫畫喎。
今次嘉獎禮其實係希望透過弦樂，鼓勵一班學生無懼逆境克服困難。獲得「逆境自強大獎」嘅溫倚潼就話，疫情下成日要對住電腦練琴，但因為網絡唔穩定所以練得比較辛苦，佢最大嘅願望係可以快啲返學院練習。而佢嘅導師、贏得「年度導師大獎」嘅王健聰亦分享，初時要遙距授課覺得都幾困難，但後來重新審視教學方式後，就開始熟諳遙距教學技巧。佢仲話，同面授相比，遙距教學無疑係有某啲局限，但反而可以令到小朋友掌握自行換弦同修理樂器嘅技巧，實屬意料之外。
卓妮