中環出更：反駁王百羽「拐帶論」 盧偉國：12港人屬棄保潛逃
話說有國家領導人上周喺深圳特區建立四十周年活動上，提出要促進內地同香港澳門融合發展，仲要吸引更多港澳青少年到內地就業同生活。但身兼資訊科技界選委嘅元朗區議會議員王百羽尋日喺一個論壇上話香港年輕人因為十二港人「被拐帶」至內地，而對內地失去信心，寧願離開香港出走外國亦唔願意到內地發展，同場嘅工程界議員盧偉國隨即反駁，批評王嘅說法與事實不符，直斥唔應該以政治角度，矮化同醜化大灣區發展。
王百羽唔單止提及十二港人「拐帶論」，又話喺《港區國安法》實施後港人言論自由被剝削，更多年輕人寧願離開香港，走去台灣、美國、歐洲發展，反映現時年輕人對中國失去信心。佢仲話深圳喺內地嘅「網絡長城」中，而港人就一直享受網絡自由，反問已習慣享有自由嘅港人又點會甘願被限制自由。
斥醜化大灣區發展
盧偉國隨即反駁，直指王嘅「拐帶論」與事實不符，又話嗰十二名港人係「棄保潛逃」。佢又特別舉例，話有啲內地創科企業，例如全球掌有領導地位嘅無人機技術同互聯網銀行、微眾銀行都係由港人開設。佢認為現時已有融合所得的實際例子，強調不能單以政治角度，矮化同醜化大灣區發展，直斥係唔公道嘅講法。
佢又話喺一國兩制下，香港有特殊地位與優勢，喺經濟、文化同專業方面都同國際接軌，所以喺香港同內地融合發展大前提下，香港要利用自身優勢同內地城市及澳門，一齊做到互惠共贏。
卓妮