政情：鄧家彪爭取連任勞顧會 促港府推失業津助

鄧家彪報名時話本港經歷黑暴事件，加上新冠肺炎疫情重創經濟，令各行各業嘅僱員面對就業困難同收入減少。佢又批評資方經常步步進逼，例如喺增加勞工假期至十七日嘅事宜上拒絕談判，要求盡快將勞工假同銀行假睇齊、要求政府即刻推出失業或停工現金津貼、為最低工資落實一年一檢等。

新一屆選舉下月進行

唔少人都希望香港可加快步伐促進科技發展，但佢反而憂慮電子商貿同人工智能發展會威脅勞工嘅生存空間，亦指香港經濟結構太過單一，認為即使疫情過去，就業前景都無辦法完全恢復。

現屆勞顧會委員任期將喺今年屆滿，新一屆選舉將於十一月廿一日舉行，選出嘅委員任期為兩年至二○二二年十二月三十一日。