政情：教育委員會選主席 黃碧雲甩轆急撤提名
話說尋日喺立法會教育事務委員會主席選舉上，泛民主派內部原本協調好由教育界議員葉建源出戰爭奪主席之位，但民主黨（白鴿黨）議員黃碧雲（一舊雲） 一度「甩轆」，竟然接受黨友提名，一舊雲經多名泛民議員提醒同批評後，決定撤回提名，而葉建源最後亦都不敵建制派議員梁美芬，無緣做主席。
被泛民議員批評後補鑊
進入提名程序期間，新民黨議員容海恩提名梁美芬，議員毛孟靜就提名葉建源，民主派多名議員亦互相提名，期間一舊雲就接受黨友許智峯提名。話口未完，就有泛民議員大叫問一舊雲「搞咩啊」，隨後仲批評一舊雲，甚至有議員叫佢退選。
臨派選票之前，一舊雲就發言話多謝議員提名，話自己教過大學同中、小學，連博士生都有教過，所以有資格出任主席一職，但自己想投畀葉建源，所以決定撤回提名同退出選舉。黃一講完，葉劉即兩度反問：「你即係棄選喇喎？黃議員，你棄選？」黃亦確認自己棄選。最終梁美芬擊敗葉建源當選主席，梁當選後稱時間唔夠，唔能夠完成副主席選舉，要留番下次會議進行。