中環出更：開會玩接龍 照當選主席 張宇人遭揶揄行為不當
立法會議員係公帑出糧嘅，但有議員不時喺會議上玩手機。飲食界議員張宇人尋日喺房屋事務委員會選舉正副主席嘅會議上玩手機「接龍」遊戲，隨後喺主持會議時，連番遭泛民主派議員揶揄，呼籲他不要再玩手機，又質疑該行為是否恰當。
正當議員喺房屋事務委員會上進行提名期間，張宇人攞手機出嚟玩接龍遊戲，隨後更當選為該事務委員會嘅主席。喺接住嘅食物安全及環境衞生事務委員會上，議員許智峯喺會上提出規程問題，指有議員喺會議上玩接龍遊戲，問呢種行為係咪恰當？要求作出裁決，惟張回應話唔係規程問題。
叫錯譚文豪個名 被寸爛賭
隨後多名泛民議員喺提名後都呼籲張宇人「唔好打手機喇」，其中議員譚文豪喺提名時，更指資訊科技界議員莫乃光打手機比張仲厲害，但張喺會議上冇就其行為作出回應。
另外，喺邀請譚文豪發言時，張宇人一度叫譚文豪做「譚文就」，譚則反駁話譚文就係以前嘅一個騎師，仲話「睇嚟你都幾鍾意賭馬，果然數口精嘅人都鍾意去馬會，你係咪好趕時間，今日係禮拜三定禮拜六呢？」至於呢個事務委員會嘅主席就由漁農界議員何俊賢當選。
卓妮