中環出更：一反男主外傳統 董吳玲玲老公煮得一手好餸
傳統上「男主外，女主內」，太太主要負責照顧家庭同煮嘢食，但時代已經唔同喇！依家好多丈夫都煮得一手好餸，香港善德基金會（基金會）主席董吳玲玲自爆平時喺屋企唔使煮餸，膳食由丈夫董中浩一手包辦，囝囝都好鍾意食爸爸煮嘅嘢，就連身邊朋友都大讚丈夫體貼。
董吳玲玲話老公係上海人，溫柔顧家，屋企嘅膳食都係由老公同叔仔負責，女士們唔使煮飯！董太嘅細仔董必政（Donald）自細從爸爸同叔叔身上學識廚藝，當時兩個囝囝一齊去外國留學，細仔負責煮嘢食，大仔董必成就負責清潔，各司其職。Donald到依家都會煮嘢食畀女朋友Gigi食，而Gigi都會整吓蛋糕甜品畀Donald食。
王庭聰自嘲唔識高科技
時下流行氣炸鍋，可以好方便就炸出香口美味嘅炸薯條、香辣雞翼等，香港工商總會主席王庭聰就話自己好傳統，平時煮嘢食多數都係簡單為主，例如蒸煲煮燜，煎炸就真係偏少，仲笑言高科技產品自己唔識用。佢話平日主要都係太太煮嘢食，而煮食方法都好傳統，蒸煲炒燜咁，所以氣炸鍋都唔係太必需。咁會唔會特意選擇有機蔬菜？佢就話唔係好信真係有機，坦言年紀大都唔食得多嘢，任何嘢只要適量便可。
疫情之下好多人留喺屋企學煮餸，香港愛馬女士協會主席葉思貝就話佢學煮餸嘅原因係因為佢為食！因為鍾意美食，所以就有推動力煮嘢食。佢話平時喺餐廳食到特別嘅菜式，會請教廚師嘅煮法，而好多廚師都願意分享嘅。佢仲話本身諗住跟一個外國來港嘅藍帶廚師學整西餐，可惜疫情關係廚師無嚟香港，不過將來實有機會嘅。
卓妮