中環出更：噴鼻式疫苗 小朋友易扭計 李家仁：打針仲乾脆
「醫生，唔打針得唔得呀？」為免皮下注射嘅短暫痛楚，有藥廠研發噴鼻式疫苗。綽號「小明」嘅兒歌醫生李家仁，就指噴鼻式疫苗看似非常適合小朋友，惟引入巿面多年，採用率都係較低。李家仁指小朋友都好抗拒有人觸摸自己嘅鼻哥，而噴鼻式疫苗則需於兩邊鼻孔噴灑，醫護人員往往只係噴咗一邊鼻孔就遇到小朋友扭計，咁倒不如爽快咁打一針，更來得乾脆直接。
雖然針劑同噴鼻式嘅疫苗，兩者成效相若，但李家仁指後者嘅價錢較前者高出逾倍，加上患有哮喘、鼻敏感嘅小朋友及孕婦不宜，以及儲存期較短，都可能係噴鼻式疫苗於香港未能普及嘅原因。儘管同針劑相比係有所不及，但李家仁認為噴鼻式胰島素若研製成功，咁就造福廣大嘅糖尿病患者。至於有冇方法可以令到打針冇咁痛呢？李家仁話只要針嘴夠銳利，打針嘅痛感其實好有限。佢又話見過一位年僅四歲半嘅男童好冷靜咁話唔怕打針，因為「痛」只係一種感覺，李家仁聞言隨即肅然起立，向對方鞠躬話多謝大師賜教！
香港醫療專業人士協會創會主席江明熙係老人科醫生，佢留意到噴鼻式疫苗，年逾半百者未必適用，但幸好長者對於打針，遠遠唔及得小朋友咁抗拒。然而老人家身體機能退化，就算同一劑量，長者可產生嘅抗體都要較年輕人為少。由於長者經常接觸孫兒，而小朋友又往往從同學嘅交往中惹得流感，對於要居家安老嘅長者而言，孫兒或同住嘅家人都接種疫苗，預防流感就更周全。
張蕙然贊同喺學校打流感針
瑪利諾醫藥福利會主席張蕙然（Jennifer）認為，與其由家長陪同去診所，不如畀小朋友喺學校接種疫苗，因為唔想喺一眾同學面前示弱，小朋友嘅表現就會較為堅強，而佢嘅一對仔女，稍後亦會喺學校打流感針。Jennifer指疫情導致前線醫護嘅工作量大增，今年如果多啲人接種流感疫苗的話，有望減輕醫療系統嘅負擔，佢仲話就算係屋企嘅外傭，亦應該得到流感疫苗嘅保護。
卓妮