政情：反對派延任 想唔亂都難 謝偉俊奢望立會休養生息
延任一年嘅立法會下星期開鑼，有建制派議員主張呢年應該休養生息，之不過同時預計反對派喺議會將會更加激進，睇嚟大家都無得抖喇。
籲避免討論爭議性議案
議員謝偉俊（Paul）話嚟緊一年，最想見到一個回復平靜嘅議會，不過佢話上個月只係召開特別會議審議防疫抗疫基金撥款，開波嗰陣一眾反對派議員已經擾攘一輪，認為佢哋會努力咁證明自己夠激進，以爭取支持勝出明年嘅立法會選舉。雖則話今屆立法會延任不少於一年，但Paul話其實七個月左右又會再次展開選舉。覺得目前最好就係把握時間休養生息，聚焦喺防疫同振興經濟上，而避免討論爭議性議案。政府早前計劃全面禁止加熱煙，但有關草案因早前會期不足而「胎死腹中」，Paul就覺得草案係剝奪市民嘅選擇權，事實上係無傷大雅，預料政府會重新將議案交上立法會。
至於垃圾徵費，Paul覺得疫下市民經濟困難，唔係最好嘅時間攞出嚟討論，但預計政府會繼續推展。睇嚟大家都預料反對派留任，未來一年議會生態恐難以平靜。政府強推爭議性議案，包括明日大嶼工程，會唔會係惟恐天下不亂呢？