政情：與泛民區議員會面 徐英偉嬉皮笑臉
今屆區議會同政府關係麻麻哋，政府代表開會期間拉隊走人嘅場面不時出現，又有區議員就區議會事務提出司法覆核。作為同區議會對口嘅決策局官員，民政事務局局長徐英偉上任將近半年，尋日終於同多位民主派區議員碰頭。雖然會面並無不歡而散、拉隊離席嘅場面，不過會後就有區議員狂鬧徐英偉，直斥佢嬉皮笑臉同埋態度差，甚至質疑佢「識唔識正面回應問題」。
話說徐英偉喺上任初期，曾經邀約區議會正、副主席會面，之不過就慘食檸檬，當時有區議會主席寧願先做地區工作都唔想會面。隔咗幾個月後，一眾民主派就去信邀約會面，最終就訂咗喺尋日，除咗觀塘區，連埋離島區議會代表一共約廿名區議員出席，會面長達約兩小時。其實會面前都有區議員擔心淪為政治騷，覺得冇乜實質嘢傾到。
鍾錦麟指對會面感失望
民主派本身預備咗約十二個議題向徐反映，包括官員唔應該擅自離席、撤回總署要求部分議員簽署有關營運開支償還款額嘅書面聲明等。作為民主派聯絡會議召集人、西貢區議會主席鍾錦麟喺會後就話，徐英偉並無確實回應訴求，雖則口講開放，但追問如何跟進就冇特別回應，覺得係欠公眾一個交代。鍾表明對會面感到失望，覺得睇唔到政府有誠意改善同區議會嘅關係，至於日後會否杯葛會議，鍾就話要視乎政府嘅誠意。
出席黨友節目亦被暗寸
有份出席會議嘅離島區議員梁國豪就直斥徐態度差，鬧爆佢冇正面回應問題，質疑徐儘管係碩士畢業但唔識得正面回應。梁仲話，徐喺會上經常嬉皮笑臉，雖然都多次提醒對方唔好笑，但徐就係咁繼續笑，相信往後嘅會議都好難約。同時亦有參與會議嘅區議員透露，徐喺會上經常遊花園，就算有回應都係流於空泛，答咗等於冇答。不過講開又講，其實徐英偉都唔係第一次被批冇正面回應，早前佢出席其黨友、議員鄭泳舜嘅節目時，一講起區議會政治化問題，佢就以「市民心中有數啦」去避過，即場仲疑似畀鄭暗寸添。無論對住建制定民主派，徐英偉都一律帶大家遊花園，真係唔知話佢一視同仁，定係話佢只懂迴避問題好喇！