政情：馬時亨再抱孫 大女馬露明添第四B
香港嘅生育率長期偏低，有唔少年輕一代都唔肯生仔，令到社會上出現人口老化。不過凡事總有例外嘅，香港教育大學校董會主席馬時亨嘅大女馬露明一向鍾意大家庭，本身已經生咗三胎嘅佢，尋日又再添丁喇，喺山頂明德醫院誕下佢嘅第四個BB添，可以話係完滿嘅六口之家。
已育三仔一女 成六口之家
話說馬露明同丈夫都好鍾意小朋友，佢哋亦有共識婚後要組織一個大家庭，計埋啱啱出世嘅細仔，兩人已育有三仔一女，包括四歲嘅大仔同一對一歲嘅龍鳳胎。至於細仔個名亦已經諗好咗，佢哋兩公婆決定取名劉智安（Matthew Joanthan Lau），寓意智慧、平安喜樂同上天嘅禮物咁話。
本身從事教育事業嘅馬露明之前都講過，自己好重視同小朋友相處嘅時間，但都覺得疫情下好多事情都變咗在家工作，話時間分配的確係一大挑戰呀！