政情：初選涉違法 泛民開支隨時倒貼
政府將立法會選舉押後一年，參選人陸續提交選舉開支申報。不過政府早前多番強調民主派初選涉嫌違法，唔少曾參加初選嘅人士喺選舉工程豪花幾廿萬，隨時要自食其果填數喇。
參選區議會（第二）嘅荃灣區議員岑敖暉嘅總選舉開支高達五十萬七千港元，當中有近三十萬港元用嚟向民主動力支付製作同宣傳費，包括籌備選舉論壇，而岑都煞有介事，用咗八百蚊喺論壇化妝費。岑亦係被政府取消參選資格嘅十二人之一，政府唔會發還選舉開支，但佢就獲得約五十萬六千港元嘅選舉捐贈，所以埋單計數只要攞一千蚊出嚟啫。
素人羅庭輝使咗83萬
不過其他民主派參選人就冇咁好彩喇，參選新界東選區嘅本土派鄒家成總共用咗近五十萬港元，用咗三十三萬喺代理人同選舉助理開支，佢有約十七萬選舉捐贈，即係要倒貼逾三十一萬。參選新界西選區嘅學民思潮前發言人黃子悅都用咗近五十萬，同樣喺代理人同選舉助理開支上用得最多，雖然佢有近三十萬嘅選舉捐贈，但自己要倒貼將近廿萬港元。
除咗參與民主派初選嘅人士，參選新界東嘅羅庭輝雖然係素人，但佢都使成八十三萬，仲要喺今次選舉中冇任何選舉捐贈，睇嚟佢嘅財力非常雄厚喇！