政情：網民鬧爆環保政策 港府係最大舊垃圾

政府喺貼文度提到，社會喺推動經濟及城市發展嘅同時，亦要保護環境，包括低碳轉型減緩氣候變化、節能慳電、惜物減廢、改善空氣質素同支持綠色復甦。問大家對推動環保有咩意見？有咩諗法同計仔咁話。

轟年批千萬破壞生態

點知市民嘅回應非常尖銳，直言全港最大舊嘅垃圾就係政府，仲講咩環保呀！不如全部高官返屋企收檔，已經幫到香港環保好多！又鬧爆垃圾政府連垃圾徵費都搞唔到仲同人講環保，叫呢堆高官去堆填。有人就反問要環保又明日大愚（明日大嶼）？有本地組織就留言話現時政府做嘅所謂環保，根本係一塌糊塗，例如保育生物多樣性，但環境局根本就係破壞生態，政府仲年年批出過千萬蚊破壞生態，真係保育嘅悲哀喎。

促解散港台刻不容緩

另外亦有網民話政府不如派三萬蚊先喇，又或者執咗港台一定係最環保，解散港台，刻不容緩。但同一時間都有網民畀具體嘅建議，例如建議全港每人都持有一張環保卡，類似八達通卡，每星期有回收物資就可入分，滿一千分可直接減稅或租用區內設施減少收費等，藉此鼓勵市民喺日常生活中支持環保。

其實香港嘅環保政策一向遭人詬病，黃錦星過去嘅環保工作亦唔見乜嘢成果，不但推動電動車無果，就連廢紙棄置量都持續多年增加，但同時回收量卻逐年下跌，實在係難以想像，再加上醞釀多年嘅垃圾徵費草案喺上屆會期胎死腹中，所以至今都係空談。若果長此下去，套番網民嗰句，黃錦星「收檔」算喇！