中環出更：郭家麒貼文涉辱警 團體促革除議席
本身係醫生嘅公民黨（公文袋）議員郭家麒，早前喺社交網站發文批評警察係「一堆綠色物體，甘作為殘暴政權嘅走狗」。有團體尋日相繼去政府總部請願，譴責郭辱警同煽動仇恨，要求革除其議員及醫生資格。
團體批評郭家麒侮辱維持治安嘅警隊為「綠色物體」，質疑佢未能做好公職人員嘅榜樣，言行令立法會蒙羞，亦與佢議員同醫生嘅身份唔相稱，認為佢繼續擔任議員會係天大笑話，繼續行醫更會令市民不安。
多方指摘 郭死唔認錯
面對多方指摘，郭喺社交平台回應仍死唔認錯，話留意到警隊同工會嘅反應，覺得痛心，認為佢哋忽視咗原本嘅問題，只會加深市民對警隊嘅不信任。又話作為議員有責任為公眾監察警隊，指出警隊缺點係希望佢哋可以糾正錯誤，並檢討每次行動安排，重拾市民信心同挽回形象咁話。
至於郭批警察係綠色物體，多方促請革除其醫生資格，佢回應話深知醫者道德，唔會放棄拯救任何生命，並會全心全意為民眾服務，仲反過嚟指摘警方同樣曾以「黃色物體」形容穿着黃背心嘅「守護孩子行動」成員喎。
卓妮