中環出更：中學生尋夢 設計時裝鬥「比武」
相信每個人細個都寫過「我的志願」，其他人嘅志願就唔清楚啦，但卓妮可以肯定，前排參加中學生時裝設計比賽嘅學生，一定個個志願都係做時裝設計師！事關嗰日嘅作品由設計、剪裁，乃至縫製都係由班學生一手包辦，仲有模有樣添，而且同佢哋傾偈嗰時，個個講起時裝設計都雙眼發光，好似鑿住夢想兩個字咁，可見佢哋對時裝設計嘅熱情。
早前第二屆全港中學生時裝設計比賽舉行頒獎禮，主題係以「武術」元素設計服裝，比賽嘅評審之一、大學時期修讀設計嘅中港新世代協進會執行主席王詩雅就大讚，覺得依家嘅中學生好犀利，估唔到今次成功入圍頭十名嘅參賽者，整出嚟嘅作品咁有水準，有啲仲成功將武術同大眾化元素融合，相信會有人想買嚟着咁話。
今屆攞冠軍嘅中六學生張睿希就話，自己非常鍾意時裝，呢個可能同爸爸都係做布料設計同裁衣製衣有關，天生對時裝感興趣。張話細個成日幫芭比娃娃換衫，未上中一就無師自通識得自己整裙整衫，有時遇到製衣上嘅問題就會向爸爸取經。佢仲話屋企人都好支持佢，嚟緊打算去外國選讀時裝設計，坦言外國時裝界發展成熟又多出路，更有利佢朝住自己嘅時裝夢進發。
男仔亦可帶動潮流
另外兩個攞到優異獎嘅參賽者，未來亦想成為時裝設計師。同係中六學生嘅陳文龍話，中一便選讀設計科，對時裝設計嘅興趣亦愈嚟愈濃，仲話唔一定係女仔，男仔都可以帶動時裝潮流。而就讀中三嘅姚靖柔就話，由於自己從未專門學過設計，平時有咩唔識，就會請教曾做製衣嘅婆婆，呢啲都成為咗兩婆孫嘅專屬回憶。
卓妮