政情：研肺癌標靶治療 莫樹錦獲封腫瘤學巨人
國際肺癌權威、中文大學醫學院腫瘤學系系主任莫樹錦幾年前獲歐洲腫瘤學會獲頒「終身成就獎」，近日就獲國際著名腫瘤學多媒體資源平台OncLive譽為「腫瘤學巨人」，表揚佢喺肺癌研究及治療上嘅卓越領導同埋貢獻，同時佢亦係首位來自歐美學府以外嘅得獎學者。
全球共15位專家得獎
今年一共有超過八百位全球癌症專家獲提名，評審委員就由超過一百二十位國際知名嘅腫瘤專家、醫生同埋科研人員組成，選出十五位全球頂尖嘅癌症專家為二○二○年度「腫瘤學巨人」。
對於獲獎，莫樹錦就話同世界知名腫瘤學權威共同獲榮譽感到非常光榮，仲話多年來同研究人員一步一步克服各種困難改進肺癌治療，感激佢哋嘅付出同埋支持。莫樹錦多年嚟重點研究同肺癌有關嘅生物標記同埋分子標靶治療，多項研究成果一直處於世界領先地位，扭轉咗肺癌治療嘅方向同埋訂定全球肺癌嘅新準則。