政情：郭家麒Fb批評警為走狗 警方點名駁斥
公民黨議員郭家麒上周四喺Facebook貼文，批評警察「是一堆綠色物體，甘作為殘暴政權的走狗」，指佢哋可能學歷唔高、水平不足，但有高薪厚祿吸引佢哋死心塌地作奴隸，仲反問「這樣便成為高壓獨裁統治者的一個工具，出賣了自己的靈魂，這樣值得嗎？」警方尋日就事件發貼文，點名批評郭惡意中傷同埋羞辱警員，直斥佢為求政治目的不擇手段。
指為求政治目的不擇手段
警方話郭家麒作為醫生理應明白遭惡意中傷、誣告同埋侮辱自身專業嘅感受，又鬧爆郭為求政治目的不擇手段，肆意貶毀警員，有違有德者同公職人員應有嘅道德操守，亦與醫者應有嘅高尚品格背道而馳，令人遺憾。警方話警員自去年六月以嚟，一來要面對致命武器嘅威脅，二來要面對惡意中傷、羞辱同起底，但仍堅守崗位，又認為經歷過去一年幾嘅社會創傷同埋反覆嘅疫情，香港依家需要嘅唔係政治掛帥嘅人身攻擊，而係團結一致重建家園。
對於被警方點名批評，郭家麒回應查詢時話覺得不感意外，但認為警方嘅字眼用得好重。佢解釋當日嘅發文原因，話由上年嘅示威衝突，以至早前十二歲女童被男警撲倒地上、孕婦遭警員推跌等事件，都令人感到心痛，強調貼文只係希望警員自我反省，思考過去嘅執法行為係咪恰當。佢仲話覺得好失望，因為依家警方畀人觀感就係不願反省，覺得所做嘅行為都係正確。