政情：港台屢犯惡意中傷 梁家榮狡辯又中箭
年花十億元公帑嘅香港電台，唔單止被炮轟係大花筒，而部分節目亦經常被外界批評立場偏頗。港台顧問委員會上載最近嘅會議紀錄，當中有委員關注點樣避免《左右紅藍綠》或《頭條新聞》被通訊事務管理局發出警告嘅事情再次發生。而廣播處長梁家榮解畫，話接獲投訴後已迅速將該集《左右紅藍綠》下架。另外，有委員建議港台管理層熟讀何謂「惡意中傷」，並持守最基本嘅法律底線。梁家榮簡直中晒箭。
喺顧委會七月份嘅會議紀錄中，有委員認為港台若未能確保節目內容準確，聲譽或會受到無法彌補嘅損害。另有委員話港台應遵守《香港電台約章》，同時持守最基本嘅法律底線，舉例指遵守《港區國安法》同其他香港法例，同埋避免觸犯如「惡意中傷」或「誹謗」等罪行。對於通訊局最近就港台節目《左右紅藍綠》同《頭條新聞》作出嘅裁決，有委員質疑該兩集節目嘅製作標準，或前線員工喺執行相關嘅標準出現問題。時任港台顧委會主席陳建強亦詢問該集《左右紅藍綠》能夠播出嘅原因。
死撐問題集數已下架
梁家榮就「認衰」，話廣播處長作為港台嘅總編輯應就港台嘅所有節目負責；但又死撐話相信冇傳媒機構嘅總編輯可以喺節目發布前閱畢所有內容喎。跟住佢仲「戴番個頭盔」，話已喺事件發生後作最終決定，包括喺接獲投訴後迅速下令將該集《左右紅藍綠》下架、要求加強把關嘅工作並進行檢討、按照程序向有關同事加以訓斥同輔導。梁喺會議中又話港台管理層高度重視法例對傳媒嘅要求，對通訊局嘅案例同法庭就傳媒嘅裁決判詞都相當熟悉，又話港台同事具備充足的法律意識，而且一直小心謹慎行事。
主持評警行動欠持平
之不過，港台若果真係咁專業，點解又接連收到投訴呢？正如通訊局喺上月先處理完一宗有關四集《左右紅藍綠》嘅投訴，指主持評論警方執法行動時言論欠持平，又冇畀警方適當機會回應，而通訊局認為投訴成立，並向港台發出警告。
另外，陳建強喺會議上亦話收到由議員何君堯發出嘅投訴信，指不滿《鏗鏘集》記者喺經過一年時間仲未對「七二一」進行全面剖析，反而在訪問中針對何。陳認為既然有議員從《約章》角度就節目標準同質素對港台提出意見，佢希望港台管理層可作回應，避免社會誤會，又話若有不足之處，亦可予以改進。但梁家榮就認為該投訴信反映社會對「七二一」有唔同疑問，又話呢類追查真相嘅節目，有時難免會令某啲人感到冒犯，因而引來一啲激烈反應。
其實梁家榮早已公開話唔會續約，意味下年就會離任。唔知佢係咪諗住反正都就嚟離開港台，所以就唔處理相關問題呢？