中環出更：爭拗國安法條文 楊岳橋容海恩擺BB上枱

話說公民黨（公文袋）議員楊岳橋昨日喺論壇節目上，話有市民貼幾張紙就遭到危害國家安全嘅指控，甚至試過有人藏有、管有反修例單張及海報就被拘捕，覺得令人痛心喎。

容暗諷楊唔熟法例

議員容海恩（Eunice）回應楊嘅質疑，就暗諷對方唔熟法例，即場引述法律條文幫佢「補課」，楊聽唔入耳，突然打斷Eunice話「唔好讀嘢喇容海恩，你答唔到我嘅問題，就咁讀書冇意思（口架）！」Eunice聞言，就話楊唔熟悉法例而提出問題，但又唔畀機會人家解答，質疑楊係明知故問。而楊就重申問題，話「咁管有（反修例宣傳品）算唔算呀？」Eunice就答其實管有同製作差唔多。楊隨即借題發揮，話「我管有個BB，同製作BB都唔同啦！」面對楊嘅「挑機」，Eunice立刻反駁話「我唔知BB係邊個嘅，可能你管有嘅BB都係你製作嘅呢！」

其實兩位議員都唔係第一次講起BB，早喺三年前，佢哋都有一同應邀體驗聾啞父母嘅日常生活同埋如何照顧子女。當時兩位都係湊仔新手，縱使搞到手忙腳亂，但都會分享吓湊B經驗。但今時唔同往日喇，同樣講起BB，不過就擺咗上枱，雙方用嚟互窒囉！

卓妮