中環出更：出口美國需標「中國製造」 吳宏斌：港品牌仍具競爭力
早前美國宣布所有從香港進口貨品，都必須標示為「中國製造」（「Made in China」），各界都擔心此舉會否削弱本港營商環境。香港中華廠商聯合會（廠商會）日前舉行會員大會，會長吳宏斌認為，本港競爭力仍在，只要消費者繼續對香港品牌有信心，邊個地方製造相信不太重要，所以有關措施對本港廠家影響有限，認為香港仍然有優勢。
吳宏斌又指香港營商環境嘅好壞，就同其他國家及地區一樣，受到好多因素嘅影響。但吳相信香港品牌嘅商品遠近知名，因此就算喺其他地方設廠、甚至乎係中國製造，相信品質都屬於中上，因此不太擔心。另香港資金仍係自由流通，呢樣優勢係好多地方做唔到嘅。
史立德：香港勝在有人才
副會長史立德及第二副會長徐晉暉亦有出席。講到本港競爭力，史就話香港係一個非常特別嘅地方，雖然冇任何天然資源，但勝在有人才，況且香港人有豐富嘅國際視野，加上得天獨厚嘅地理環境，背靠祖國又面向世界，中西文化融合形成別具一格嘅競爭力，正因為具有其他地方難以比擬嘅條件，所以史對香港嘅未來絕對有信心，又相信待疫情好轉後，消費恢復暢旺，市道跟住就會愈來愈好。
另一名副會長吳國安同樣都話，只要香港保持品牌嘅信譽，相信競爭力仍在。佢提到，香港品牌喺外國市場都好受歡迎。至於美國要求香港進口貨品標示為「中國製造」，珠寶業所受影響應該最大，但其實美國市場所佔嘅比重唔算高，只要改為出口日本、歐洲等地就可抵銷影響。佢仲話，香港人見慣風浪，由六十年代開始打拚，經歷七十年代股災，八十年代北上設廠等，相信現時遇到嘅問題都能夠迎刃而解。
卓妮