政情：爆大鑊至補鑊 西九董事局鬥卸膊

改貴設計 栢被指自作主張

西九董事局成員葉傲冬尋日朝早出席一個電台節目時爆料話，栢志高同董事局一早唔啱牙，狠批佢成日自作主張，例如董事局經常都好遲先知道，栢志高喺某啲建設項目上，擅自修改原本建築設計，而且造價貴幾倍，鬧爆佢唔尊重董事局。葉仲批評佢喺部分已落成建築物嘅裝修工程上未有嚴謹使用公帑，例如提交嘅預算金額嚇人，但經商討後又可以平價好多，鬧爆佢作為前高級公務員，做事唔符合「應使則使」原則，而佢作為行政總裁亦無做好負責同埋把關角色。咁講法，簡單啲講即係鬧栢志高係「大花筒」。

其實西九文化區工程超支一直被批評係無底深潭，政府最初二○○八年就話總工程預算係二百一十六億元，惟工程延誤多年，至二○一九年單係綜合地庫工程申領嘅額外撥款已經接近二百三十六億元。咁大型嘅工程，相信都唔會一個人話晒事，依家似乎有人想將責任推晒畀栢志高。

何慶基斥監管不力 架構官僚

作為局外人嘅西九博物館前顧問小組成員何慶基，就炮轟係文化區運作、營運模式及監管機制等出現嚴重缺失。

何慶基仲鬧爆，西九管理局負債嚴重，質疑西九文化區接二連三有行政總裁離任，董事局每次都「爆大鑊先補鑊」，狠斥管理局架構官僚，促請政府檢討。何又擔心，如果繼任人係公務員，只會令西九未來愈來愈有機會變成「爛攤子」同「和稀泥交到貨就收工」。

咁又係，與其話栢志高隻手遮天，倒不如話係成個董事局長期得過且過，明知有問題又唔出聲，事後先呻不被尊重，又疑似被人架空。講到尾，西九項目呢個爛攤子，每個董事局成員都難辭其咎，因為係管理不善嘅結果。西九文化區係一笪靚地，但可以搞十幾廿年都唔知搞咗咩出嚟，唔怪得香港競爭力每況愈下，輸晒畀鄰近城市喇！