中環出更：社會變化快得驚人 余嫿學多技傍身
一場疫情不但改變世界格局，就連「家有千金，不如一技傍身」呢句說話，將來亦可能要有所調整。本業係時裝設計嘅傑出青年協會（傑青會）前主席余嫿，面對不景嘅巿道，應對方法係報讀多個課程以圖開拓其他出路。佢又話時代已經唔同咗，現代人已經唔可以只懂得掌握一門技能。
余嫿報讀嘅課程如翡翠鑑證、廚藝、瓷畫、動漫figures等，都係佢過去鮮有涉獵嘅範疇。余嫿指長久以來嘅社會觀念，係掌握一門技能就可終生受用，然而現今社會，破舊立新嘅速度愈來愈快，今日自己賴以維生嘅專業技能，難以保證他朝仍有用武之地。另一方面，科技推動同埋社會演變又會產生一啲前所未有嘅職業，譬如藉KOL推介商品嘅影響力行銷，就係因應線上商業而冒起嘅事物，而疫情嘅出現，就進一步深化呢個現象，為咗緊隨呢股商業發展嘅大趨勢，所以佢都有報讀KOL嘅課程。
靈活應變 趙傑文投入網購
疫情導致訪港旅客銳減，另一位傑青會前主席趙傑文，佢為酒店提供資訊科技服務嘅生意亦大吹淡風。有見今年口罩需求大增，趙傑文迅速投入網購生意，並由初期以銷售口罩為主，逐步進展成化妝品同凍肉都有得賣嘅線上生活百貨。佢話跟隨時勢靈活調整路線，係港人生存之道。
余嫿同趙傑文早前出席一個名為「疫後晴天‧傑青同行‧分享祝福」捐贈計劃嘅啟動禮，籌款委員會主席鄧智傑喺金融界任職，佢話疫情引致全球巿況波動，金融界嘅情況真係驚濤駭浪，不過相較於航空同旅遊業，影響算係冇咁嚴重。鄧智傑指好多行業都陷於水深火熱嘅田地，不過佢認為疫情冇大反彈的話，相信最壞嘅時刻已經過去。香港國術總會創會會長王嘉恩話顧慮到疫情，無奈要暫停向小朋友推廣國術嘅活動。雖然時下流行線上教學，但王嘉恩認為習武須掌握正確招式，國術還是以面授為宜，否則學壞姿勢導致受傷，咁就無謂啦。
卓妮