光哥問阿晴：「咦？阿晴，乜個螢幕好好聞咩？」阿晴回答：「光哥，你唔好笑我啦。我對緊啲設計圖呀，晏少少就要落現場同個客對啦，近啲對得清楚啲，唔可以有錯。」光哥說：「做嘢認真係好，但都要睇住自己對眼！你照下鏡，對眼紅晒啦，啲人唔知以為你做到喊呀！」
阿晴照一照鏡：「咦！係喎！講講下仲好似痕痕哋添！」光哥說：「梗係啦，你咁集中精神又咁近距離望住個螢幕，令到你眨眼嘅頻率減少，咁蒸發咗嘅淚水唔能夠及時補充，咪搞到隻眼又紅、又乾、又痕囉。你依家試下眨多幾次眼，增加番眨眼嘅頻率，將啲淚水掃番上眼滋潤下啦！」阿晴立即眨多兩下眼：「收到！」
光哥再說：「記住呀，使用電腦、智能電話或者其他電子設備嗰時，要保持350至600毫米嘅觀看距離。話時話，你有冇聽過20-20-20護眼法則？」阿晴一臉疑惑：「20？15，20？」光哥一臉無奈：「20-20-20護眼法即係每使用電腦20分鐘就小休20秒，並遠望20呎外嘅景物，可以幫助紓緩眼睛嘅疲勞。咁簡單就記住佢啦！」阿晴：「收到！即記！」
光哥又問：「頭先聽你講，你一陣係咪仲要去戶外工作？」阿晴回答：「係呀，落現場同個客對一對外牆設計。」
光哥說：「咁提多你一句，喺戶外工作佩戴品質良好嘅太陽眼鏡係保護眼睛嘅良好方法。要留意選擇可過濾所有紫外光嘅太陽眼鏡，鏡片上要有製造商註明UV 400nm或100% UV absorption嘅標籤。」阿晴說：「明白晒！」
職業安全健康局
www.oshc.org.hk