為咗控制疫情，港府實施嘅邊境管制措施，不但影響港人到內地探親及工作，對旅遊業嘅衝擊更屬史無前例，雖然防疫抗疫基金曾為旅遊業推出支援計劃，然而杯水車薪，要挽救陷於倒閉邊緣嘅旅遊業界，恐怕只有重啟業務一途。香港旅遊業議會主席黃進達就認為，既然本地疫情趨向緩和，而內地同澳門嘅疫情較為平穩，港府點解唔實施有限度通關呢？反正中秋節大家都想人月兩團圓，畀個機會旅遊業做吓生意，「吊住鹽水先」都好吖。
