政情：泛民初選涉違法 開支申領凍過水

范國威開支52萬

多位民主派參選人早前被DQ，當中包括有意競逐連任法律界議員嘅公民黨郭榮鏗，佢總共用咗逾五萬元，個人開支就佔咗近三萬元，大部分用喺選舉活動設計上，佢獲得黨捐贈約一萬五千元，意味佢自己要貼三萬五千元。實際上，該黨在今次選舉為十位參選人起碼攞咗廿四萬元出來，用於拍攝形象照、選舉廣告、選舉工程設計費等，但該黨有四人被DQ，睇怕埋數都唔嘢小。

至於曾參加民主派初選嘅人士當中，出戰新界東選區嘅西貢區議員范國威總共用咗五十二萬元，使得最多係廿七萬元嘅選舉廣告，佢獲得三萬元選舉捐贈，自己仍然要畀近五十萬元。范早前因選舉呈請而喪失議員資格，獲立法會發放三十一萬元特惠金，就算貼埋出來，佢仍要貼十九萬元。

同樣參與過初選嘅仲有灣仔區議會主席楊雪盈同人民力量副主席譚得志（快必）。楊出戰香港島直選，總開支廿七萬元，其中十五萬元係選舉工程設計費，佢有近六萬元選舉捐贈，當中近四萬元係來自民主動力，其餘來自街頭募捐，即自己要貼廿一萬元。至於參選九龍東選區嘅快必總開支十五萬元，扣除民主動力捐贈嘅五萬元，自己要貼近十萬元。

建制派參選人方面，新民黨李梓敬出選新界東選區，總開支七十六萬元，其中的士廣告費就用咗廿四萬元。現任議員何君堯總開支五十七萬元，投放最多喺廣告費，自稱KOL（意見領袖）嘅佢用咗十一萬元喺社交網站落廣告。議員葛珮帆就用咗近八十萬元，獲得民建聯全數墊支，當中用咗七十二萬元喺各處落廣告，包括隧道、小巴、的士等。參選九龍東選區嘅議員謝偉俊就用咗六十萬元埋單，其中未完成嘅印刷品已經要大約三十萬元，獲得約廿五萬元選舉捐贈。

袁彌昌勁花132萬

不過，即使係現任議員，都唔及議員容海恩丈夫，新民黨前政策總裁袁彌昌使費多，出戰香港島選區嘅佢共用咗一百三十二萬元，無任何選舉捐贈，睇嚟佢財力雄厚。佢為咗選舉辯論、媒體訓練、形象設計課程等，有關費用已豪花三十六萬元。此外，佢請咗五個選舉助理，租咗兩間辦公室，好難想像若然真係做到議員要幾大使費。袁嘅定位係中間路線，睇嚟佢都深知唔左唔右、定位模糊，落足廿萬元廣告費宣傳。