中環出更：湯修齊今上任 促電子煙加熱煙全禁
圓玄學院副主席湯修齊，尋日獲政府委任為香港吸煙與健康委員會主席。湯修齊身為家長，好關注年輕人接觸煙草產品。佢話本港吸煙人數按年上升，希望政府增撥資源喺控煙及宣傳教育方面，以及全面禁止電子煙及加熱煙，等年輕人唔好受害呀。
湯修齊話，根據食物及衞生局嘅指標，政府希望喺二○二五年，將吸煙人數比例控制喺百分之七點八，但點知今年吸煙人數不跌反升。佢話本港喺二○一七年大約有百分之十嘅市民吸食煙草產品，但去年嘅煙民數目就增加到百分之十點二。佢擔心政府若果提唔出有效嘅策略，就算不斷做反吸煙宣傳都未必會有成效。
倡增煙草稅減少煙民
咁應該點做呢？湯雖然今日先至正式上任，但已經做足功課，話政府上次提高煙草稅已經係二○一四年喇，當時吸煙人數迅速下跌，反問點解依家唔可以再提高，繼而減低煙民嘅數量呢？
對於加熱煙同電子煙，佢希望政府可以全面禁止，否則就會有唔少年輕人受到煙草禍害。佢舉例話新型電子煙產品，好多都冇臭味，甚至乎有香味，容易吸引年輕人吸食，家長亦難以發現。雖然有人會覺得係時尚，但其實全部都含有害物質囉！
卓妮