中環出更：無得出埠好吊癮 黃家和期待旅遊氣泡
適逢中秋同十一假期，雖然可以連續幾日毋須上班，但好多地方都礙於疫情而封關多時，無法再現港人趁住長假期出門旅行嘅盛況。就最近港府宣布與多個國家商討落實旅遊氣泡措施，如果事成的話，對於熱愛旅遊嘅香港人嚟講，會唔會係一個佳音？
香港餐飲聯業協會會長黃家和，就話落實旅遊氣泡佢一定舉腳贊成。因為自己做開葡萄酒文化旅遊，經常游走歐洲同東南亞各地，一年起碼都去五、六次，加上自己鍾意去唔同地方食嘢，依家幾個月來都冇得出門實在「好吊癮」，況且佢喺法國有一個酒莊，兩星期前當地嘅葡萄開始進入收成期，自己無法親赴惟有透過人手調配，以應付採摘同釀酒嘅準備工作，佢仲講笑話有時真係想買張機票飛過去，就算到埗後要隔離亦在所不惜。雖然酒莊嘅所在地人煙疏落，甚少確診個案，不過佢補充，無論目的地喺邊，啟程前都要留意當地疫情，做足防疫措施自然玩得安心。
莊健成最想去泰國享受陽光
新界潮人總會主席莊健成因為喺內地有生意，期望往來中港同澳門嘅健康碼盡快落實。佢話每年都會同家人去旅行及回鄉，依家困喺香港咁耐，若果旅遊氣泡得以落實，最想一家人去泰國旅行，好好咁享受一下當地嘅陽光與海灘。莊健成又指過往經常以歐洲為旅遊目的地，然而當地嘅疫情比較嚴重，暫時唔會考慮。
香港中華總商會永遠榮譽會長莊學山，早前同太太喺太古廣場拍拖購物。卓妮問佢如果落實旅遊氣泡嘅話，會唔會出去行吓呢？莊學山就話莫講話佢自己，佢相信大家都有意出門，短暫出去抖吓氣都好吖。不過佢話目前留喺香港都有好多活動，譬如會去打吓高爾夫球，但由於近來大家都留喺香港，以致多咗人去打高爾夫球，唔少朋友都卜唔到場咁話。
卓妮