政情：吳宏斌盼如期辦工展會 助中小企解困
本港經濟持續低迷，香港中華廠商聯合會（廠商會）尋日舉行會員大會，會長吳宏斌就提到，近半年本港經濟出現「斷崖式」下挫，預計明年本港經濟難以回復至疫症前水平，但就希望每年十二月嘅工展會可以舉行，以助中小企業度過寒冬。
吳宏斌指去年發生連串社會事件，但廠商會仍排除萬難，順利舉行工展會，希望今年亦都能如期進行，相信展銷可以為中小企帶來現金流，撐住佢哋度過寒冬，然而工展會至今仍未知道能否落實。鑑於大型展銷活動需要時間籌備、招商等，佢促請政府多方面配合，以及提供清晰指引。
另外，佢亦提到今年本港實質本地生產總值（GDP）錄得有統計以來最大跌幅，並已連續四個季度出現負增長。如果疫情受控，明年經濟可望重返百分之二至三嘅低增長範圍，但整體經濟仍難以回復到疫情前水平。
吳表示，最近本地私人消費、企業投資、對外商品同服務貿易皆受重創，現時環球疫情雖逐步紓緩，但經濟重啟同對外開放嘅步伐受阻，預計旅遊業未來數月繼續停擺，勞工市場前景亦唔樂觀，妨礙消費市道復甦。