政情：全民檢測數據Hea答 郵政公務員事務局鬥卸責

被問寄單張數量 僅答「一批」

之後我哋向譚凱邦查詢，佢話睇完回覆文件嗰一刻，感到非常氣憤，所以忍唔住將文件撕爛咗，然後跟手將「廢紙」拎咗去回收。就荃灣區全民檢測嘅安排及檢討，佢話有唔少問題要向政府多個部門作出查詢。然而唔單止香港郵政草率作答，其他由公務員事務局代表政府各部門所回答嘅問題，亦都係答非所問，唔知搞邊科咁。

其後我哋再向香港郵政同埋公務員事務局查詢，香港郵政就話已經回答咗荃灣區議會，表示政府八月底已經向全港住宅及商業單位投寄一批資料單張，當中包括荃灣區，冇其他補充。又話若果區議員有其他查詢，都樂意回答喎。而公務員事務局就以電話方式回覆，話郵政署已經回覆咗，局方冇補充。

話說政府推出嘅全民檢測計劃係由公務員事務局全面統籌，為嘅係檢視社區感染情況同埋盡早找到隱形患者。但實際上，成個計劃港府動用五億三千萬元，但只係搵到三十二個新確診個案，平均每個確診個案花費千幾萬。

計劃效益低燒銀紙 仍拒釋疑

另外，政府預料會有五百萬名市民參與，點知接受檢測嘅市民最終都只係得百幾萬，搞到負責統籌今次計劃嘅公務員事務局局長聶德權都要搵遮醜布，叫市民唔好討論開支值唔值得。政府理屈詞窮，自然令到市民質疑計劃嘅推廣是否出咗問題。

區議會依家就檢測計劃而發出詢問，想了解當局派咗幾多宣傳單張啫。但點知咁簡單嘅問題，局方都答唔出，而朱曼鈴為首嘅香港郵政又同公務員事務局「互相拋波」，含糊其詞。定係政府唔記得統計資料單張嘅數量，所以先至答唔出呢？真係令人百思不得其解。無論如何，政府部門間互相卸膊、數據又唔公開，透明度咁低又點樣叫人信服呀？