中環出更：警隊教防電騙 掟毒蘋果落樓
警隊前日喺社交平台出咗一則附有連環圖嘅貼文，呼籲市民提醒父母提防電話騙案，並列出不同角色同答案，揀選代表「由得父母被騙」嘅毒蘋果，即刻被掟落樓，引起網民熱烈討論，話警隊影射《蘋果日報》。
則貼文係咁嘅，話說警隊嘅虛擬吉祥物提子問：「如果父母收到內地官員電話應該點做？」連環圖裏面嘅橙同士多啤梨，異口同聲答「收線」。至於蘋果，就答「由得佢俾人呃」，結果蘋果被掟落樓。
過去屢發聲明斥報道失實
據了解，警隊用意係想帶出「唔提醒父母留意電話騙案，父母隨時被騙幾十萬甚至幾百萬，等如掟錢落樓」；至於點解揀蘋果，因為係毒蘋果囉，睇嚟網民可能真係諗多咗。
不過，話時話，警隊過去曾多次發聲明，指《蘋果日報》作出失實報道，又話《蘋果》成日以假消息惡意煽動讀者仇視警察，顛倒是非，背離新聞道德，淡化暴徒嘅違法行為，意圖中傷警方，報道極為偏頗等，今次網民作出聯想，一啲都唔奇喎。
卓妮