政情：選主席屢爆分歧 公民黨擬轉內閣制

現時公民黨執委會成員嘅產生，候選人需獲兩名黨員提名，再喺周年黨員大會上被選舉。據悉工作小組建議地區支部主席以外嘅執委改用「內閣制」方式選出，每張候選名單由五至十四人組成，需指明主席、兩個副主席、秘書長同司庫，每張名單需最少十名普通黨員提名。地區支部主席同青年公民主席方面，以往由地區支部選出，周年黨員大會通過後履新。據悉今次修章，相關職位要喺周年黨員大會上獲過半數信任票先當選。如有支部主席中途離任，新嘅支部主席需通過執委會信任投票。

不再常設黨魁 非議員始可做主席

今次修章亦包括將總行政幹事一職同公司秘書脫鈎，同增設「臨時執行委員會」。依家黨內先進行諮詢，下月底將舉行特別黨員大會處理，屆時需要至少有廿名黨員出席，要過半數支持先獲通過。

值得留意嘅係，該黨黨魁須由議員出任，但今次修章建議就無規定必須有黨魁，而該黨主席係非議員先做得。呢個安排好易令人聯想到，如公民黨議員唔接受延任，豈不是人人都有資格做主席？