政情：胡志偉認白鴿黨老派唔夠激
民主黨（白鴿黨）就議員延任問題而進行民意調查，作為白鴿黨主席、議員胡志偉承認該黨畀人感覺「老派」同做得唔足夠，但認為該黨已有提升抗爭，唔敢話改善到大部分人對該黨嘅睇法，至於達唔達到市民滿意嘅水平就要由市民決定。
指延任民調討論失焦
胡認為同抗爭派嘅分歧唔係原則問題，而係策略問題，又強調黨內嘅決定係由佢同黨團作出，自己唔係被垂簾聽政。副主席、議員尹兆堅就認為市民對民主派信心唔夠，係因為啲工作做得唔夠，所以只能加把勁，又話該黨喺過去一年嘅反修例運動中，所受嘅警暴佔最多，而且有唔少議員被捕，證明該黨係願意付出，希望會以工作同行動改變。
對於即將進行嘅民調，尹形容氣氛淡靜，而且以情緒主導為主，佢仲認為依家民調嘅討論已失焦，覺得抗爭派未就兩方面作解說，包括議會嘅長遠功能同係咪喺今年做完民調，明年都要再做民調。佢仲話民主派喺議會內係防守狀態，唔少人喺參選時都希望進入議會做改變，質疑點解喺延任風波發生時，議會突然變得唔重要，形容依家好似係突然對議會有新認知。