中環出更：「泳池都要戴口罩」 康署解說不清捱鬧
因應新冠肺炎疫情緩和，康文署今日會重開各區游泳池，但署方除咗規定部分豁免情況外，泳客需要喺泳池範圍一直佩戴口罩，惹嚟市民批評政策解說唔清晰被鬧爆。政府唔止做嘢慢半拍，康文署署長劉明光解釋政策更加係唔湯唔水。
康文署重開泳池會採取特別措施，規定市民身處喺泳池範圍內需要一直佩戴口罩，市民睇到呢度已經嚇親，再睇詳情先知原來有五個豁免情況，包括游水、沖身、往返更衣室同泳池、往返唔同泳池，或者同其他人相距至少一點五米時做熱身運動都毋須戴口罩。
市民嘲要用氧氣筒游水
署方解說政策似乎太過複雜，引起市民批評話係挑戰大家嘅理解能力，其實可以簡單啲話喺更衣室，除沖身時都必須戴口罩。仲有市民一睇到喺泳池範圍需要一直佩戴口罩，就以為連游水都不獲豁免，問係咪需要用防水口罩，仲擔心戴住口罩游水會缺氧，覺得要用氧氣筒游水添！
卓妮