中環出更：「要贏在起跑線」 鍾樹根嘆歲半孫女要返學
九月係開學季節，隨着疫情緩和，唔少面授課堂都慢慢恢復。前議員鍾樹根日前就同太太一齊帶孫女上Playgroup，鍾樹根話孫女歲半都未夠就要返學，令佢不禁感嘆香港教育失敗，加上要一早起身，真係忍唔住大叫「好眼瞓啊」！
鍾樹根話因為未請到工人姐姐，所以就由佢同太太呢兩位公公婆婆帶孫女返Playgroup。佢形容返學路途長途跋涉，佢喺社交平台上載嘅相片都睇到佢哋又要搭巴士又要行路，佢抱住孫女行時就唱歌「小小姑娘，清早起床，提着書包上學去」，又自嘲係「走音王」，之後仲忍唔住大嘆「好眼瞓啊！」佢話喺自己細個嘅年代連幼稚園都少人讀，通常直接讀小一，係唔知幾時開始出現「贏在起跑線」嘅講法，香港人怕執輸，最後咪搞到啲小朋友未夠八個月已經開始返Playgroup啦，佢仲講笑話直情貴過讀大學呀！
施榮懷榮升二叔公
時間飛逝，父母可能一眨眼就發現身邊嘅仔女已經大個咗好多。推行素食主義嘅社企Green Monday創辦人楊大偉（David）同囡囡關係親密，經常喺社交平台分享一家人嘅生活照。David日前上載咗一張同囡囡一齊搭船嘅相片，仲形容係「爹哋的浪漫」，原來囡囡不知不覺已經十歲大喇，時間真係過得好快！有網友留言話兩父女簡直係餅印，又大讚甜到漏，而David都回覆「的確係好甜嘅」，又有網友話囡囡大得好快，David都感嘆囡囡大得太快喇！
唔講唔知，香港中華廠商聯合會永遠名譽會長施榮懷最近做咗「二叔公」。吓！唔通佢擴展業務，開埋當舖掌櫃？咪諗錯隔籬，佢喺社交平台上載咗張抱住ＢＢ女嘅相，宣布自己榮升二叔公呀！好多網友見到張相，都紛紛送上祝賀，大讚ＢＢ女可愛。
卓妮