政情：家人中招 植潔鈴籲防WhatsApp遭入侵

冒充媽咪要求轉發驗證碼

事緣Elaine媽咪同細妹嘅WhatsApp早前先後遭到入侵，佢了解事件來龍去脈之後，發現騙徒時下嘅犯案招數。佢話細妹早前喺睇戲時收到媽咪嘅訊息，先問佢得唔得閒後，就話如果收到驗證碼就要轉發訊息畀佢。細妹當時以為媽咪有急事，所以不虞有詐就即刻照做。點知原來媽咪嘅WhatsApp已被入侵，細妹將驗證碼交畀對方之後，亦即刻中招，失去帳號控制權。

對於騙徒呢種手法，Elaine話唔少人都唔清楚，誤以為係程式出現故障。佢提醒大家，如果發現問題時應該重新登入WhatsApp以驗證自己嘅帳號。否則，騙徒有可能會繼續用同一個模式，聯絡你身邊家人及朋友，一傳十、十傳百之下，就會有更多人受害，甚至可能會叫人買點數卡呃錢。

佢笑指自己比較醒目，平時都有留意電騙個案，又話騙徒手法層出不窮，強調所有社交媒體同應用程式都有機會畀人入侵，再三呼籲如果有人遇到上述嘅情況，有懷疑都應該打畀對方確認一下；如果不幸受騙，就要即刻報警啦！