政情：出書惹來何君堯指摘 薛浩然：冇用過鄉議局一毫子
前日召開嘅新界鄉議局執行委員會會議中，作為執行委員之一嘅何君堯因會議枱上擺放一本由已故「新界王」劉皇發嘅妹夫、鄉議局研究中心主任薛浩然所著嘅書籍惹怒，隨即喺社交網站貼文，鬧爆薛浩然不務正業，浪費鄉議局嘅錢，建議鄉議局要節流，唔好留冗員咁話！薛浩然尋日就此事作公開回應，澄清書中有佢個人嘅學術體現，又話何君堯唔清楚有關嘅工作同財務安排，其實佢嘅新書付梓，並冇動用過鄉議局一毫子。
指整合資料係學術體現
薛浩然就事件作出兩點回應，首先，關於何君堯指出書中有好多資料出自馬會及有關學者係事實，但薛就解釋，整合呢啲資料就係佢個人嘅學術體現。其次，佢個人與研究中心及鄉議局嘅工作同財務安排，何君堯可能並唔清楚，認為何喺社交媒體嘅指控並非屬實，強調作為公眾人物要對自己言行負責。
薛仲透露，出書費用大部分係由基金贊助，約百幾萬港元，印咗大約一千五百本，尋日只係送畀在場人士，如果想認購多啲先至需要畀錢買，而有關收入都會用嚟資助研究中心。
因為新書出版而惹來批評，薛浩然都唔係第一次。鄉議局喺二○一四年初成立研究中心，隨即就撥出三百萬元，但研究中心成立以來出版嘅書，反應都未如理想。二○一五年，時任副主席嘅張學明更曾在執委會上，當眾批評薛浩然辦事不力，要求中心清楚交代帳目，又話花錢做出來嘅研究要言之有物，雙方一度舌戰「駁火」。