中環出更：憂特權法查示威資金來源 林卓廷恨延任理由多多
民主派議員是否延任立法會，仍有很大爭議。傾向留任嘅民主黨議員林卓廷尋日接受網台訪問時，就細數民主派議員留守議會嘅理由，譬如繼續議會抗爭，同埋力阻建制派引用俗稱「特權法」嘅《立法會（權力及特權）條例》調查去年反修例示威嘅資金來源。
指會再拉布肢體衝突
林卓廷話明白唔少市民同支持者，認為延任一年嘅議員失去選民授權，故決定以民調方式解決分歧，指本月廿九日將會有初步結果。不過佢即指出，民主派若留任議會，主要嘅工作將會係議會抗爭，包括透過議事規則「拉布」或肢體衝突抗議。鑑於近日有十二名港人因涉嫌非法越境而遭到內地當局扣押，林卓廷話會繼續向政府施壓，希望可以讓相關港人盡快回港。
林卓廷又提到，經民聯議員梁美芬打算引用特權法調查去年反修例示威嘅資金來源，若民主派失去議席，將無力阻擋民主派人士被公審及清算。而民主派喺議會內則能裏應外合，以時間換取空間，引起國際社會注意。其實林卓廷嘅憂慮，正好說明民主派嘅抗爭行動若果係堂堂正正的話，又何需對特權法調查有所顧忌呢？
卓妮